Ииун 30 рзы Аҧснытәи аҳәынҭқарратә университет аҟны имҩаҧысит сынтәатәи аушьҭымҭацәа реихшара. Уи иалахәын ауниверситет анапхгара, Аҧсны Aҵареи абызшәатә политикеи рминистрра, араионқәа рҵаратә Усбарҭақәа реиҳабацәа, афакультетқәа рнапхгаҩцәа.
Иазгәаҭатәуп, аушьҭымҭацәа рахьтә ишыҟоу уажәнатә аусура иалагахьоу, иара убасгьы аҧхьаҟазы зхатәы хырхарҭа ылызххьоу. Хықәкылатәи аҿаҵаҧҟала аҵара зҵоз ракәзар, еихшоуп дасу иахьынтәаашьҭыз араионқәа рахь. Зҵара иацызҵарц зҭаху - уи азы алшарақәа роуеит.
Ауниверситет аҵараус апроректор Виктор Маланӡиа иажәақәа рыла, Урыстәыла зҵара иацызҵар зҭаху иреиӷьӡоу аушьҭымҭацәа еснагь иреиӷьӡоу аҵараиурҭақәа рахь рдәықәҵара иацхраауан, иахьагьы иацхраауеит.
Аихшара иалахәыз аҧыза-министр ихаҭыҧуаҩ, афинансқәа рминистр Владимир Делба аушьҭымҭацәа дрыдныҳәалеит, ирзеиӷьишьеит изнылаз аҧсҭазааратә мҩаҿы аманшәалареи ақәҿиарақәеи.
Ауниверситет анапхгара араион аҵара Аусбарҭақәа рахь ааҧхьара ҟарҵеит ирзымхо азанааҭқәа рганахьала ашкол иалго аҿар хықәкылатәи аҿаҵаҧҟала ауниверситет ахь иаарышьҭларц, иагьақәдыргәыӷит урҭ араҟа ацхыраареи ахылаҧшра ҷыдеи шроуа азы.
Сынтәа Аҧснытәи аҳәынҭқарратә университет иалгеит зынӡа 465-ҩык аҿар.
Мҩамш!
Последнее изменение Четверг, 02 июля 2020 15:04